ԽԱՄՍԱՅԻ ՄԵԼԻՔՈՒԹՅՈՒՆՆԵՐԸ
Խամսայի մելիքությունները իրական պատմություն է հինգ մելիքների մասին ովքեր տիրել են արցախի տարբեր մասերում:
Բայց իրենց սխալ քաղաքավարության վարելու դեպքում ու իրենց մեջ եղած դավաճանների միջոցով կործանվեց Ղարաբաղի մելիքությունները: Հայ ժողովրդի պատմությունը հարուստ է օտար տիրապետության դեմ մղված պայքարի դրվագներով: Գտնվելով տարբեր քաղաքակրթությունների հատման կետում, ունենալով աշխարհագրական բացառիկ դիրք` Հայկական լեռնաշխարհը միշտ ենթարկվել է զավթիչների արշավանքներին: Ժողովուրդը մշտապես պայքարել է օտարի լծի դեմ` հայրենի հողի վրա կորցրած պետականությունը, իր ազատություններն ու իրավունքները վերահաստատելու համար: Այս պայքարից արցախահայությունը անմասն չի մնացել, ավելին` պատմության որոշ փուլերում իր վրա է վերցրել այդ պայքարի առաջատարի դերը:
XVI դարի վերջերին Ղարաբաղում կազմավորվեցին ինքնատիպ վարչա-քաղաքական միավորներ, որոնք պատմագիտության մեջ հայտնի են «մելիքություններ», իսկ դրանց տիրակալները` «մելիքներ»/սեմական բառ է եւ նշանակում է «թագավոր»/ անվամբ: Մելիքները դարձան հայ ազգային իշխանությունը կրողները:
Մելիքների ջանքերով էր, որ Արցախում XVII դարի վերջերից ծնվում եւ գլուխ է բարձրացնում պարսկական լծից հայրենիքի ազատագրման գաղափարը: Այս ժամանակահատվածում հայերը, զինված պայքարին զուգահեռ, դիվանագիտական ջանքեր էին գործադրում` հայացքն ուղղելով սկզբում դեպի Եվրոպա եւ ապա` Ռուսաստան: Այդ պայքարի հետ են կապված այնպիսի քաղաքական ու ռազմական գործիչներ, ինչպիսիք են Իսրայել Օրին, Մինաս վարդապետը, Գանձասարի կաթողիկոս Եսայի Ջալալյանը, Ավան, Թարխան յուզբաշիները /հարյուրապետ/:
XVIII դարի սկզբին Պարսկաստանում ծայր առած անիշխանությունը սպառնում էր նրա ամբողջականությանը: Պարսկաստանի մասնատումից իրենց բաժինն էին ցանկանում ստանալ ե°ւ հարեւան Թուրքիան` իր համար տեղում ձգտելով ապահովել Դաղստանի լեռնցիների օժանդակությունը, ե°ւ Ռուսաստանը` օգնականներ պատրաստելով հայերի ու վրացիների շրջանակներում: Միաժամանակ Ռուսաստանը իրեն էր վերապահում նաեւ քրիստոնյա ժողովուրդների ազատագրման առաքելությունը: Այդ իրավիճակում ավելի բարենպաստ պայմաններ էին ստեղծվել արցախցիների ազատագրական պայքարի համար:
Չնայած այդ ժամանակաընթացքում հայկական դիվանագիտության նկատմամբ Ռուսաստանի ցուցաբերած հետաքրքրությանը` գործը խոստումներից այն կողմ չէր անցնում:
Հույս դնելով ռուսական կայսրերի վրա` հայերը դրանով իսկ թշնամացնում ու էլ ավելի էին գրգռում մահմեդականներին, որոնք հնարավորության դեպքում դաժան հաշվեհարդար էին տեսնում նրանց հետ: Այսպես օրինակ, 1721թ. Ռուսաստանի արշավանքը դեպի Պարսկաստան: Հենց սկզբում ռուսները կարողացան գրավել Դերբենդը եւ Բաքուն: Խոստացված օգնության փոխարեն Պետրոս Ա-ն խորհուրդ տվեց հայ ժողովրդին թողնել իրենց հայրենի հողերը եւ տեղափոխվել Դերբենդ, Բաքու, Գիլան եւ Մազանդարան, ուր արդեն տարածված էր ռուսական տիրապետությունը: Մտադրվելով ամրապնդել նվաճած մերձկասպյան խանությունները, Ռուսաստանը 1724թ-ի հունիսի 12-ին Թուրքիայի հետ կնքեց պայմանագիր` վերջինիս գործողությունների ազատություն տալով ողջ Անդրկովկասում /մինչեւ Շամախի/: Նույն թվականին երկրամաս ներխուժեցին օսմանյան բանակները: Նրանց գլխավոր զոհ դարձավ Արցախի հայությունը, որը մելիքների գլխավորությամբ եւ ռուսների աջակցության հույսով համարձակվել էր պայքարի ելնել իր անկախության համար, այդպես էլ չստանալով Ռուսաստանի խոստացած աջակցությունը: Չնայած այդ ամենին Պետրոս Ա-ի պարսկական արշավանքը նոր լիցք հաղորդեց հայոց պայքարին:
1720-ական թվականներին Ղարաբաղում կազմավորված հայկական զինվորականությունը կենտրոնացվեց երեք բանակատեղիներում կամ սղնախներում /ամրացված տեղ/: Դրանցից առաջինը, որ կոչվում էր Մեծ սղնախ, գտնվում էր Մռավի լեռներում, Թարթառ գետի մոտ: Երկրորդը` Փոքր սղնախը, գտնվում էր Վարանդա գավառի Քիրս լեռներում, իսկ երրորդը` Ղափան գավառում: Սղնախները` իմա հայ զինվորականությունը, իրենց մեջ կենտրոնացնում են երկրի ամբողջ իշխանությունը: Դա մի ժողովրդական զինվորություն էր, հրամանատարների խորհրդի գլխավորությամբ, ուր իր տեղն ու ազդեցությունն ուներ նաեւ Գանձասարի կաթողիկոսը: Պատերազմական ժամանակի պահանջներից ելնելով` մելիքներն իրենց իշխանությունը բաժանում էին յուզբաշիների հետ, ընդ որում` ռազմական խորհուրդներում նրանք բոլորը ունեին հավասար իրավունքներ ու պարտավորություններ:
Հայերի նկատմամբ Պետրոս Ա-ի քաղաքականությունը շարունակվեց նրա կնոջ` Եկատերինա Ա-ի /1725-1727/ եւ թոռան` Պետրոս Բ-ի /1727-1729/ օրոք: Ցարական կառավարությանն ուղղված` ռազմական աջակցության մասին հայերի խնդրանքները, ինչպես եւ նախկինում, մնում էին անպատասխան: Հայ զինվորականությունը` իր պայքարի առաջնորդներ Եսայի կաթողիկոսի, Ավան եւ Թարխան յուզբաշիների գլխավորությամբ բավական երկար դիմակայեց օսմանյան կանոնավոր բանակին: Սակայն կտրված լինելով բոլոր կողմերից եւ միայնակ մնալով իրենց պայքարում` հայերը չէին կարող հասնել իրենց վերջնական նպատակին` անկախությանը: Եւ ի վերջո, 8-ամյա թեժ պայքարից հետո, հայոց Սղնախները թուլացան, որից հետո հյուսիսային կամ բուն Ղարաբաղը բաժանվեց անջատ մելիքությունների` վերադառնալով իր նախկին քաղաքական կարգին:
Սակայն այդ պայմաններում մելիքությունները չհրաժարվեցին օսմանցիների դեմ պայքարից: Այս անգամ հայերն իրենց հայացքը դարձրին 1729թ. պարսկական գահ բարձրացած Նադիր շահին, որին հաջողվեց ժամանակավորապես վերականգնել իր երկրի երբեմնի հզորությունը: Նրա օրոք հայերին տրվեցին մի շարք արտոնություններ, քանզի վերջիններս պայքարում էին Պարսկաստանի արյունարբու թշնամի Օսմանյան Թուրքիայի դեմ: Նադիր շահի օրոք Արցախ-Ղարաբաղի բազմաթիվ մելիքությունները միավորվեցին` ձեւավորելով հինգ մելիքություններ, որոնք ղեկավարում էին երկիրը: Այն կոչվում էր Խամսա կամ Խամսայի երկիր, որ նշանակում է «Հինգի երկիր» եւ տարածվում էր Գանձակի սահմաններից սկսած դեպի հարավ, մինչեւ Արաքս գետը: Մելիքությունները ղեկավարում էին Գյուլիստանի Մելիք-Բեգլարյանների, Ջրաբերդի Մելիք-Իսրայելյանների, Խաչենի Հասան-Ջալալյանների, Վարանդայի Մելիք-Շահնազարյանների եւ Դիզակի Մելիք-Եգանյանների տոհմերը:
Խամսայի մելիքությունները ժամանակի ընթացքում բավական հզորանում են ու իրենց գրաված աշխարհագրական նպաստավոր դիրքով ռազմական մեծ նշանակություն ձեռք բերում` վերածելով երկրամասը մի անառիկ բերդի: Սակայն, ներքին երկպառակությունների հետեւանքով սարուջալլի թուրքական ցեղից սերած նախկին ավազակապետ Փանահին հաջողվեց ներխուժել Հյուսիսային Ղարաբաղ եւ, հաստատվելով այստեղ, հիմնել, այսպես կոչված, «Ղարաբաղի խանությունը»: Փանահ խանին հաջորդած նրա որդի ու Վարանդայի Մելիք Շահնազար Բ-ի փեսա Իբրահիմ խանը 1785 թվականին դավադրաբար սպանում է Ջրաբերդի, Գյուլիստանի եւ Դիզակի մելիքներին` գրավելով Գանձասարի վանքը` հայոց ազգային-ազատագրական շարժման օջախը, ինչի արդյունքում էլ Խամսայի մելիքությունը վերջնականապես փլուզվեց: